Ua fai sina umi o e moemiti i le faatauina o se fale. Sa e manatunatu lelei i ai, sa tou talanoa i ai ma au uo ma lou aiga, ma atonu foi ua e maua ni fautuaga faapitoa e faatatau i lenei mataupu. Ua maua lau faaiuga, e mafai ona faatau sou fale. Ua e iai nei i le vaega mo suesuega i le taimi nei. E te fia iloa poo le ā se fale e mafai ona e faatauina, le vaipanoa e mafai ona e faatauina ai se fale, ae pe fia se tau. O nisi nei o faamatalaga e ono fesoasoani ia te oe i le vaega lenei.

Le Tagata O Le A Galue I Le Va O Oe Ma Le Faletupe Mo Se Mokesi - I lenei vaega, e moomia ona faatulaga se tou feiloaiga ma lau faletupe e siaki pe fia se tupe o iai i lau faaputugatupe ma pe e te gafatia ona fai se mokesi. O le a ta‘u ane e le faletupe ia te oe poo le ā se fale e te ono gafatia ona faatau ae pe fia foi se tupe o le a latou malilie e nonō mai ia te oe. Afai e te lē manao e te fesoota‘i i lau faletupe, e mafai ona e faaaogā se tagata ua tomai faapitoa e mafai ona galue e fai ma ou sui i le faia o feutana‘iga ma kamupani nonōtupe.

Faufautua I Le Faiga O Paketi Ma Mea Tau Tupe - Afai o loo faafaigata ona talia le faiga o se mokesi, e ono fesoasoani lou talanoa atu i se faufautua mo le faiga o le paketi ma mataupu tau tupe. E manaia foi le amata i le upega tafailagi a le Money Talks auā o loo aumai ai se lisi o auaunaga uma lava ua faamaonia i lou vaipanoa mo fautuaga i le faiga o le paketi.

Upega Tafailagi A Kamupani Faatau Fale A Le Real Estate - O upega tafailagi a le Real Estate NZ, Trade Me ma le OneRoof, o nofoaga lelei na e te suesueina i ai fale i vaipanoa o loo e manao e te nofo ai. Afai e aumai e le faletupe ia te oe se tulaga o se aofaiga latou te ono nonō atu ia te oe, o le a mafai loa ona amata fai sau lisi o fale e te ono manao e te alu e vaai.

Aua ne‘i galo lou talanoa atu i isi tagata ē mafai ona fesoasoani mai. O le vaega lenei o lau faigamalaga, ua tatau ai ona mafai e le kamupani faatau fale i lou vaipanoa, o lau faletupe ma/poo se tagata o le a fai ma ou sui e feutagai ma le faletupe mo se mokesi, ona latou aumai ia te oe ni faamatalaga lelei.

Pe na e silafia, ua saunia e le Kānga Ora - Homes and Communities ni polokalame ma tupe faameaalofa e fesoasoani ia te oe ina ia e umia se fale?

Fesoasoani Tau Tupe - O loo iai i le upega tafailagi a le Kāinga Ora se vaega mo i latou ua umia fale, e mafai ona fesoasoani ia te oe ia e silafia auala e faafaigofie ai ona maua sou uluai fale. O se punā‘oa lelei tele pe a e mafaufau e fia faatau sou fale, ma o loo iai faamatalaga i le auala e mafai ona lagolago atu ai le Malo o Niu Sila ia te oe i lau faigamalaga mo le umiaina o sou lava fale. E aogā le siaki o lenei vaega e vaai pe e te ono agavaa mo le mauaina o se fesoasoani e faatau ai lou fale. Tagai i le: kaingaora.govt.nz/firsthome.

O nisi nei faamatalaga atili i nonōgatupe ma tupe faameaalofa e mafai ona e agavaa i ai mo:

Le Tupe Faameaalofa Mo Le Uluai Fale - O iinei e ono mafai ai e i latou faatoa faatau ni fale poo i latou foi sa faatau muamua o latou fale, ae pe tusa ma le tolu tausaga talu ona fai e lē aunoa a latou saofaiga mo le KiwiSaver, e ono agavaa mo se Tupe Faameaalofa mo le Uluai Fale (First Home Grant) e oo atu i le $10,000. E te talosagaina lena tupe faameaalofa e auala atu i le Kāinga Ora. E mafai lava ona muai talia (pe talia) sa‘o lava lau talosaga pe a fai i luga o le upega tafailagi a le Kāinga Ora, le kaingaora.govt.nz/firsthomegrant.

Le Nonōgatupe Mo Le Uluai Fale - O se nonōgatupe faapitoa lenei e faamaonia e le Kāinga Ora lea e moomia ai na o le 5% e fai ai le tiposi mo se fale. Tagai i le upega tafailagi a le Kāinga Ora mo se lisi o faletupe uma o loo auai i lenei polokalame faapea ma faamatalaga i le auala e agavaa ai, kaingaora.govt.nz/firsthomeloan.

Tupe Tala Mai Le KiwiSaver Mo Se Uluai Fale - Afai o iai sau KiwiSaver, e ono mafai la ona e tala mai i tua lau KiwiSaver mo le faatauina o lou uluai fale. O se polokalame lenei a le malo e mafai ona e tala ese mai ai i tua lau tupe uma na sefe i lau KiwiSaver (se‘i vaganā le $1,000) e tuu i le faatauina o lou uluai fale. Faafesootai le kamupani o loo fai ai lau KiwiSaver mo nisi faamatalaga.

KiwiBuild - O le KiwiBuild o se polokalame o loo fesoasoani i le faateleina o nisi fale e gafatia le tau ma fai i ai le filifiliga, ma tele ai avanoa mo tagata Niu Sila e faatau ai ni o latou lava fale. Afai e te agavaa, o loo ofoina mai e le KiwiBuild se filifiliga tele o fale e ono fetuai ma oe. E mafai ona e silafia atili le auaunaga a le KiwiBuild, siaki pe e te agavaa ma matamata ai foi i ni fale a le KiwiBuild o loo avanoa, pe a e tagai i le latou upega tafailagi kiwibuild.govt.nz.

Ua e latalata lava ina iloa poo fea e te fia nofo ai, ae o le ā foi le ituaiga o fale e mafai ona e faatauina. Atonu foi ua uma ona e talanoa atu i se vaega faatau fale ma auai atu i nisi o taimi e tatala ai fale mo maimoaga, ma ua iai foi sina ou silafia i le tele o se tupe o le a malie le faletupe e nonō mai ia te oe. Ua matuā atoatoa nei au tapenapenaga e faatau sou fale. O nisi nei o faamatalaga i mea e mafai ona e faia ina ia faafaigofie ai le faatinoga o le vaega lenei.

O le vaega lenei e tele lava ina aofia ai le muai faiga o talosaga ma talosaga mo nonōgatupe ma tupe ia e faameaalofa mai e le malo ma isi polokalame na, atonu o loo avanoa mo oe. 

Tapenapena Au Pepa Tāua - O le taimi lenei ua tatau ona amata tapenapena au pepa tāua mo le faletupe poo se tasi e galue i le va o oe ma le faletupe mo le faiga o lau mokesi (mortgage broker). E tatau ona tou galulue faatasi ma sui o nei kamupani mo lenei fuafuaga. A‘o lei faia le talosaga, e lelei pe a sauniuni faatasi uma faamatalaga manaomia ina ia alofia ai foi le toe tolopō mulimuli ane. E te moomia pepa e pei o se faamaoniga o le nofoaga o loo e nofo ai (proof of residency), pepa faailoa ou totogi (wage slips), faamaumauga o lau tusitupe (bank statements) ma pepa e faatumu ai le talosaga.

KiwiBuild - Afai e te manao e faatau mai se fale a le KiwiBuild, e tatau ona e siaki muamua pe e te agavaa mo le latou polokalame ma faaoo atu sau talosaga i le upega tafailagi a le KiwiBuild e aumai ai se tali pe muai taliaina oe ma agavaa e te faatau mai o latou fale. E moomia ona faamautinoa lou agavaa ina ia faamae‘a ai le faatauina o se fale a le KiwiBuild pe tuu ai foi lou suafa i se palota a le KiwiBuild. E mafai ona e silasila i fale uma lava a le KiwiBuild o loo avanoa i le taimi nei i luga o le latou upega tafailagi i le kiwibuild.govt.nz.

Manatua, e moomia ona maua se faamaoniga e te agavaa mo fale a le KiwiBuild a‘o le`i faamae‘a lou faatauina o se fale a le KiwiBuild.

Tupe Tala Mai Le KiwiSaver mo Se Uluai Fale - Afai o loo e fuafua e faatau sou fale, o le a moomia ona e talosaga mo le tupe lea e tala mai lau KiwiSaver mo lou uluai fale. O le a mafai ai ona e faaaogā le tupe o lau KiwiSaver e fesoasoani i le tiposi o sou fale (e tatau ona faatotoe ai le $1000 i lau KiwiSaver e ui e iai aiaiga o agavaa e tatau ona ausia). Faafesootai le kamupani o loo fai ai lau KiwiSaver mo nisi faamatalaga.

Nonōgatupe Mo Le Uluai Fale - Afai e te fia faaaogāina le Nonōgatupe mo le Uluai Fale (First Home Loan) (lea e na‘o le 5% e moomia ona e maua e tiposi ai le faatauina o sou fale) ua tatau loa la ona amata faagasolo le talosaga. E lē o faletupe uma latou te ofoina mai lenei nonōgatupe, e lelei la lou tagai i le upega tafailagi a le Kāinga Ora mo se lisi o faletupe uma o loo faaaogāina lenei auaunaga, ma faamatalaga i le kaingaora.govt.nz/firsthomeloan.

Tupe Faameaalofa Mo Le Uluai Fale - O le taimi tonu lenei e te talosaga ai mo se Tupe Faameaalofa mo le Fale Fou (First Home Grant) pe saili se muai taliaina mo lenei tupe faameaalofa. O le amataina i lenei taimi o lenei faagasologa, o le a e iloa ai pe e te agavaa pe leai. Tagai i le kaingaora.govt.nz/firsthomegrant e maua ai isi faamatalaga.

Fautuaga Mai Se Loia - O le taimi lenei e te ono manao ai foi e amata ona mafaufau i se loia e fai ma ou sui i mataupu e aafia ai le tulafono – aemaise pe afai o loo e talosaga mo se tupe faameaalofa ma talosaga e tala mai i tua lau KiwiSaver mo lou uluai fale, ona o tupe nei o le a tatau ona faaalu sa‘o i le teugatupe faa-Tausi Mavaega a lau loia. O le mea lelei lava e saili i ai se loia o le upega tafailagi a le Sosaiete o Loia, lena o loo iai se lisi o loia uma i lou vaipanoa ua faamaonia mo nei mataupu. Tagai i le lawsociety.org.nz.

Ua uma ona faatulaga lelei ma ua muai talia lau tupe, o tupe faameaalofa (grants) ma isi polokalame, pe ua talia atoatoa foi. Ua e iloa pe fia le tupe e mafai ona e faaaluina, o le ā le tiposi lea e te faia, ae o le ā le ituaiga o fale e te gafatia ona totogi. Atonu ua maua sau First Home Loan ma se First Home Grant ma atonu e te faaaogāina se tupe mai lau KiwiSaver e fesoasoani i lau tiposi mo le faatauina o lou fale. O le vaega tonu lea ua amata manaia ai lau faigamalaga lea ua faagasolo. O nisi nei o nofoaga e lelei pe a e agai i ai mo nisi faamatalaga a‘o faagasolo lau suega fale.

Upega Tafailagi I Mangere Ma Ofisa Tutotonu Mo Faamatalaga
12 Waddon Place, Mangere

E manaia tele la matou upega tafailagi mo le sailia o nisi faamatalaga i mea o loo faia i totonu o le Mangere Development, pe e te susū mai foi tatou talanoa i le Mangere Information Centre. Ua ia i matou faamatalaga uma o le a e moomia mo le sailiga o se fale e fetaui lelei mo oe i le Mangere Development. O loo ia i matou foi faamatalaga i fale eseese o loo avanoa e faatau, e aofia ai faafanua ma fuafuaga ma isi faamatalaga atoa o lenei atina‘e.

Upega Taifailagi A Le KiwiBuild - I iinei e mafai ona e silasila ai i fale uma lava a le KiwiBuild o loo avanoa i le taimi nei, ma e lesitala ai i le vaega a le KiwiBuild mo tusitusiga e faailoa atu ai faamatalaga fou pe a oo ina faasilasila mai nisi fale fou.

Afai e te maua se fale ua e manao ai, o le isi laasaga o le faafesootai o le vaega na fausiaina le fale poo le vaega faatau fale, ma e auai atu i se aso e tatala ai le fale mo maimoaga (open home). O le a latou saunia ai nisi faamatalaga e uiga i le fale ma faasinosino oe i le amataga o le faagasologa o le faatauga o le fale.

Manatua e moomia ona faamautinoa e te agavaa mo le polokalame a le KiwiBuild ma ua muai talia sau tupe mo se mokesi mai se faletupe poo se isi kamupani nonō tupe ua e faamaonia, ina ia mafai ona faamae‘a le faatauina o sou fale mai le KiwiBuild. Tagai i le kiwibuild.govt.nz mo nisi faamatalaga ma faamaonia ai lou agavaa.

Afai o loo e mafaufau e te faaaogāina le KiwiBuild, o se mea lelei lou auai atu i nisi o aso e tatala ai fale mo maimoaga, ma e talanoa atu i faufale poo le vaega na latou fuafuaina le fausia o fale.

Upega Tafailagi A Kamupani Faatau Fale A Le Real Estate - O upega tafailagi a le Real Estate NZ, Trade Me ma le OneRoof, o nisi foi na o auala faigofie e saili ai mo fale.E te maua ai se manatu lelei poo le ā le fale e te gafatia pe lē gafatia ona totogi, ma ituaiga o fale e te ono manao e nofo ai.

Malo lava, o lenei ua e oo mai i le si‘ui o lau faigamalaga mo le faatauina o sou fale. Ua oo nei i le taimi e faamae‘a uma ai mea mo le faatauina o lou fale ma e nofo ai loa. Manatua, ona o oe lea e ona le fale, e fou au tupe faaalu ia ua tatau ona mafaufau i ai e pei o lafoga totogi mo auaunaga moomia (rates), inisiua ma lau mokesi. O nai faufautuaga nei ina ia faafaigofie lou ulu atu i tulaga o se tagata e onaina se fale.

Fai Se Ofa - Afai e iai se fale i le Mangere Development e te fiafia i ai, fesootai atu i le vaega o loo fausiaina fale poo le vaega faatau fale e faatalanoa auiliiliga uma pe faapefea ona fai sau ofa. Manatua e tatau ona e saili se fautuaga mai se loia ma se tagata mo mataupu tau tupe i le taimi o le a faagasolo ai lena fuafuaga.

KiwiBuild - Afai ua e maua se fale a le KiwiBuild e te fiafia i ai ma ua e manao e fai sau ofa, o le a faasinosino atu lava e lau loia ma le vaega na fausiaina le fale poo le latou kamupani faatau fale, mea ia te oe a‘o faagasolo le faatauina o le fale. Afai e faatau le fale i se faiga faapalota, o le a moomia la ona tuu lou suafa i le se‘i i le upega tafailagai a le KiwiBuild, le kiwibuild.govt.nz mafai e manuia ai lou suafa, o le a e maua loa le avanoa e faagasolo ai le faatauina o le fale.

Fai Ma Fesootai Pea - La mautinoa e te fai ma siaki i lau loia (o ia o le a vaaia tupe faameaalofa [grants] ma tupe ua tiposi ua uma ona e faamauina) ina ia faamautinoa o loo sologa lelei mea uma. Talanoa atu i lau faletupe e toe faamautinoa ua mae‘a ona faamae‘a uma pepa o lau mokesi ma ua sauni mo le aso e faamae‘a uma ai mea.

Le Aso Ua Seki Mea Uma - O le aso lenei o le a faamautū ai lau mokesi ma o le a aloaia ai foi le avea o oe ma lē e onaina lou fale fou. O le a taulima e lau loia auiliiiliga uma faatasi ma lau faletupe poo se kamupani nonō tupe ua e filifilia. O le a faamae‘a foi e lau loia isi auiliiliga pe afai o loo e faaaogāina le polokalame o le First Home Grant, First Home Loan poo le tupe lea e tala mai lau KiwiSaver mo lou uluai fale. E tatau ona e faamautinoa ua talia ma faatulaga uma nei vaega a‘o lei taitai ona oo i le aso e faamautu ai mea uma.

Inisiua Mo Le Fale Ma Meafale - E tatau ona faatulaga mea nei a‘o lei nofoia le fale. E tāpā mai e le faletupe le mea lenei ina ia inisiua lou fale, e tāua la le faatulagaina lelei E faigofie lava le faiga i luga o le telefoni, i lou vili i soo se kamupani inisiua latou te faia inisiua mo fale mameafale.

Pili Ma Le Teuina O Tupe i Le Faletupe - O se mea lelei le seki o peimegi e otomeki lava ona ave ese atu i lau tusitupe mo le totogiina o lau inisiua ma lafoga totogi mo auaunaga moomia (ma nisi lava peimegi e totogi mo mea e fesootai ma le fale). O le faia faapea, o le a paleni lelei ai ona faasafua au mea totogi mo le tausaga, ma faigofie ai foi ona totogi au pili, aemaise pe afai o se taimi muamua lea ua e umia ai sou lava fale.